Փնտրում ենք փորձագետների՝ մասնագիտական ձեռնարկի մշակման, խմբագրման և ձևավորման համար
«Իրավունքի Կողմ» իրավապաշտպան հասարակական կազմակերպությունը հայտարարում է մրցույթ՝ առողջապահության և զինվորական ոլորտների աշխատակիցների համար նախատեսված մասնագիտական ձեռնարկի մշակման, խմբագրման, սրբագրման և դիզայնի աշխատանքների իրականացման նպատակով։
Մրցույթը հայտարարվում է երեք մասնագիտական ուղղություններով՝
- Մասնագիտական ձեռնարկի մշակման փորձագետ (Professional Manual for Healthcare and Military Staff Creation Expert)
- Մասնագիտական ձեռնարկի խմբագիր և սրբագրիչ (Editing and Proofreading of Professional Manual for Healthcare and Military Staff)
- Մասնագիտական ձեռնարկի դիզայներ (Design of Professional Manual for Healthcare and Military Staff)
Թեկնածուները կարող են դիմել ինչպես առանձին ուղղությունների, այնպես էլ միաժամանակ երկու կամ բոլոր երեք ուղղությունների համար՝ համապատասխան մասնագիտական փորձի և կարողությունների առկայության դեպքում։
Մասնագիտական ձեռնարկի մասին
Նախատեսվում է մշակել գործնական նշանակության մասնագիտական ձեռնարկ՝ առողջապահության ոլորտի մասնագետների և զինվորական համակարգի աշխատակիցների համար։
Ձեռնարկի նպատակն է նպաստել ԼԳԲՏԻՔ անձանց նկատմամբ հավասար և ոչ խտրական վերաբերմունքի ապահովմանը, մարդու իրավունքների պաշտպանության ներպետական և միջազգային չափանիշների կիրառմանը, ինչպես նաև առողջապահական և զինվորական համակարգերի մասնագիտական կարողությունների զարգացմանը։
Ձեռնարկը պետք է անդրադառնա ԼԳԲՏԻՔ անձանց իրավունքների պաշտպանության, մասնագիտական էթիկայի, անձնական տվյալների և բժշկական գաղտնիության պահպանման, խտրականության ու նվաստացուցիչ վերաբերմունքի կանխարգելման, ինչպես նաև իրավունքահեն մասնագիտական մոտեցումների կիրառման հարցերին։
Առանձնահատուկ ուշադրություն պետք է դարձվի զորակոչի, բժշկական և հոգեբուժական փորձաքննության, զինվորական ծառայության ընթացքում անվտանգության ապահովման, անձնական տվյալների պաշտպանության և արդյունավետ բողոքարկման մեխանիզմների հետ կապված հարցերին։
1. Մասնագիտական ձեռնարկի մշակման փորձագետ
Հիմնական պարտականությունները
- Մշակել ձեռնարկի հայեցակարգը, կառուցվածքը և բովանդակային բաժինները։
- Ուսումնասիրել ԼԳԲՏԻՔ անձանց իրավունքների պաշտպանության վերաբերյալ ներպետական օրենսդրությունը, միջազգային չափանիշները և մասնագիտական ուղեցույցները։
- Վերլուծել առողջապահության և զինվորական ոլորտներում խտրականության և ոչ պատշաճ վերաբերմունքի կանխարգելման մեխանիզմները։
- Մշակել առողջապահական և զինվորական համակարգերի աշխատակիցների համար գործնական առաջարկություններ և մասնագիտական ուղեցույցներ։
- Ներկայացնել բժշկական և հոգեբուժական փորձաքննության ընթացքում մարդու իրավունքների պաշտպանության, մասնագիտական էթիկայի և գաղտնիության պահպանման սկզբունքները։
- Ձեռնարկում ներառել իրավիճակային օրինակներ, կիրառելի ընթացակարգեր և գործնական առաջարկություններ։
- Համագործակցել խմբագրի, դիզայների և կազմակերպության ծրագրային թիմի հետ։
- Պատրաստել ձեռնարկի ամբողջական բովանդակությունը և իրականացնել անհրաժեշտ լրամշակումները։
Պահանջվող որակավորումներ
- Բարձրագույն կրթություն իրավունքի, հանրային առողջապահության, հոգեբանության, մարդու իրավունքների, հանրային քաղաքականության կամ հարակից ոլորտներում։
- Մասնագիտական ձեռնարկների, ուղեցույցների, հետազոտությունների կամ ուսումնական նյութերի մշակման փորձ։
- Մարդու իրավունքների, խտրականության արգելքի, գենդերային հավասարության և ԼԳԲՏԻՔ անձանց իրավունքների վերաբերյալ գիտելիքներ։
- Առողջապահական կամ զինվորական համակարգերի իրավական և ինստիտուցիոնալ առանձնահատկությունների իմացություն։
- Մասնագիտական նյութերը հստակ, մատչելի և կառուցվածքային ձևով ներկայացնելու կարողություն։
- Հայերենի գերազանց և անգլերենի աշխատանքային իմացություն։
2. Մասնագիտական ձեռնարկի խմբագիր և սրբագրիչ
Հիմնական պարտականությունները
- Իրականացնել ձեռնարկի ամբողջական լեզվական, ոճական և կառուցվածքային խմբագրումը։
- Ստուգել տեքստի ուղղագրությունը, կետադրությունը, քերականությունը և շարահյուսությունը։
- Ապահովել իրավական, առողջապահական և մարդու իրավունքների ոլորտների մասնագիտական տերմինաբանության ճշգրտությունն ու միասնականությունը։
- Բարելավել տեքստի ընթեռնելիությունը, տրամաբանական հաջորդականությունը և ձևակերպումների հստակությունը։
- Ստուգել բաժինների, ենթաբաժինների, հղումների և ծանոթագրությունների հետևողականությունը։
- Համագործակցել ձեռնարկի հեղինակի, դիզայների և ծրագրային թիմի հետ։
- Իրականացնել նաև վերջնական էջադրված տարբերակի սրբագրումը՝ մինչև ձեռնարկի հանձնումը։
Պահանջվող որակավորումներ
- Բարձրագույն կրթություն բանասիրության, լեզվաբանության, լրագրության կամ հարակից ոլորտներում։
- Հայերեն մասնագիտական, հետազոտական, իրավական կամ ուսումնական նյութերի խմբագրման և սրբագրման փորձ։
- Հայերենի ուղղագրական, քերականական և ոճական կանոնների գերազանց իմացություն։
- Մասնագիտական տերմինաբանության հետ աշխատելու կարողություն։
- Մարդու իրավունքների, իրավական կամ առողջապահական թեմաներով նյութերի խմբագրման փորձը կդիտվի որպես առավելություն։
- Սահմանված ժամկետներում աշխատելու և թիմային համագործակցության կարողություն։
3. Մասնագիտական ձեռնարկի դիզայներ
Հիմնական պարտականությունները
- Մշակել ձեռնարկի տեսողական հայեցակարգը և միասնական դիզայնը։
- Իրականացնել ձեռնարկի ամբողջական էջադրումը։
- Ձևավորել շապիկը, բաժինների վերնագրերը, ենթավերնագրերը, աղյուսակները և տեղեկատվական հատվածները։
- Անհրաժեշտության դեպքում մշակել ինֆոգրաֆիկաներ, սխեմաներ և այլ տեսողական տարրեր։
- Ապահովել գունային համակարգի, տառատեսակների և գրաֆիկական տարրերի միասնականությունը։
- Համագործակցել ձեռնարկի հեղինակի, խմբագրի և ծրագրային թիմի հետ։
- Իրականացնել վերջնական ուղղումները՝ հաշվի առնելով կազմակերպության դիտարկումները։
- Պատրաստել տպագրության և էլեկտրոնային հրապարակման համար նախատեսված վերջնական ֆայլերը։
- Կազմակերպությանը տրամադրել նաև խմբագրելի դիզայնի սկզբնաղբյուր ֆայլերը։
Պահանջվող որակավորումներ
- Գրաֆիկական դիզայնի և հրատարակչական էջադրման համապատասխան փորձ։
- Adobe InDesign, Illustrator, Photoshop կամ համարժեք մասնագիտական ծրագրերի իմացություն։
- Ձեռնարկների, հետազոտական զեկույցների, ուղեցույցների կամ բազմաէջ հրապարակումների ձևավորման փորձ։
- Տպագրական և թվային հրապարակումների տեխնիկական պահանջների իմացություն։
- Հայերեն տեքստերի էջադրման առանձնահատկությունների իմացություն։
- Նախկինում իրականացված աշխատանքների պորտֆոլիոյի առկայություն։
Աշխատանքների իրականացման ժամանակահատվածը
Աշխատանքների սկիզբ՝ օգոստոսի 1
Աշխատանքների ավարտ և վերջնական արդյունքի հանձնում՝ դեկտեմբերի 1
Բոլոր աշխատանքները պետք է իրականացվեն նշված ժամանակահատվածում՝ ապահովելով բովանդակության մշակման, խմբագրման, սրբագրման և դիզայնի գործընթացների արդյունավետ համակարգումը։
Դեկտեմբերի 1-ը վերջնական հանձնման ժամկետն է, ոչ թե ձեռնարկի նախնական տարբերակի ներկայացման օրը։
Մինչև այդ օրը կազմակերպությանը պետք է հանձնվի ամբողջությամբ ավարտված մասնագիտական ձեռնարկը, որը՝
- Ունի ամբողջական և համաձայնեցված բովանդակություն։
- Անցել է լեզվական, ոճական և մասնագիտական խմբագրման ու սրբագրման բոլոր փուլերը։
- Ունի վերջնական հաստատված դիզայն և ամբողջական էջադրում։
- Ներառում է անհրաժեշտ բոլոր աղյուսակները, գրաֆիկական և տեղեկատվական տարրերը։
- Պատրաստ է էլեկտրոնային հրապարակման և տպագրության համար։
- Ներկայացվում է վերջնական PDF ձևաչափով և համապատասխան խմբագրելի սկզբնաղբյուր ֆայլերով։
Աշխատանքների ընթացքում փորձագետները պարտավոր են համագործակցել միմյանց և կազմակերպության ծրագրային թիմի հետ՝ ապահովելով վերջնական արդյունքի որակը և ժամանակին հանձնումը։
Ակնկալվող արդյունք
Աշխատանքների արդյունքում պետք է մշակվի առողջապահության և զինվորական ոլորտների աշխատակիցների համար նախատեսված ամբողջական մասնագիտական ձեռնարկ, որը կներառի՝
- ԼԳԲՏԻՔ անձանց իրավունքների պաշտպանության և խտրականության կանխարգելման վերաբերյալ իրավական ու մասնագիտական չափանիշները։
- Առողջապահական և զինվորական միջավայրերում մարդու իրավունքների պաշտպանությանն ուղղված գործնական ուղեցույցներ։
- Բժշկական և հոգեբուժական փորձաքննության ընթացքում մասնագիտական էթիկայի և ոչ խտրական վերաբերմունքի սկզբունքները։
- Անձնական տվյալների և բժշկական գաղտնիության պահպանման վերաբերյալ առաջարկություններ։
- Խտրականության, բռնության և նվաստացուցիչ վերաբերմունքի կանխարգելման գործնական մեխանիզմներ։
- Իրավունքահեն հաղորդակցության և մասնագիտական վարքագծի օրինակներ ու առաջարկություններ։
Վերջնական արդյունքը պետք է լինի ոչ թե ձեռնարկի նախագիծ, այլ ամբողջությամբ մշակված, խմբագրված, սրբագրված, ձևավորված և հրապարակման պատրաստ մասնագիտական ձեռնարկ։
Դիմելու կարգ
Հետաքրքրված թեկնածուները կարող են ուղարկել՝
- Ինքնակենսագրական (CV)։
- Հետաքրքրվածության նամակ՝ նշելով, թե որ մասնագիտական ուղղության կամ ուղղությունների համար են դիմում։
- Նախկինում իրականացված համապատասխան աշխատանքի առնվազն մեկ օրինակ կամ պորտֆոլիո։
Կարևոր նշում․ Թեկնածուները կարող են դիմել մեկ, երկու կամ բոլոր երեք մասնագիտական ուղղությունների համար։
Եթե նույն թեկնածուն ունի ձեռնարկի մշակման, խմբագրման, սրբագրման և դիզայնի համար անհրաժեշտ մասնագիտական գիտելիքները, փորձը և կարողությունները, կարող է ներկայացնել մեկ միասնական հայտ՝ ստանձնելու բոլոր երեք ուղղությունների աշխատանքները։
Այդ դեպքում հետաքրքրվածության նամակում անհրաժեշտ է նշել բոլոր աշխատանքներն իրականացնելու պատրաստակամությունը և ներկայացնել համապատասխան փորձը հաստատող աշխատանքների օրինակներ։
Հայտերը կգնահատվեն թեկնածուների մասնագիտական որակավորման, համապատասխան փորձի և ներկայացված աշխատանքների հիման վրա։
Էլեկտրոնային հասցե՝ rightsidengo@gmail.com
Նամակի թեմա՝ «Մասնագիտական ձեռնարկ 2026
Բոլոր երեք ուղղությունների համար դիմելու դեպքում նամակի թեմայում նշել՝ «Մասնագիտական ձեռնարկ – Ամբողջական աշխատանքներ»։
Դիմորդները կարող են իրենց հայտերի փաթեթները ներկայացնել նաև անձամբ՝ «Իրավունքի Կողմ» իրավապաշտպան ՀԿ-ի գրասենյակ՝ նախապես զանգահարելով +374 11 880770 հեռախոսահամարով և համաձայնեցնելով այցելության օրը և ժամը։
Հայտերի ներկայացման երկու եղանակների համար գործում է նույն վերջնաժամկետը՝ հուլիսի 5, ժամը 17։00 (Երևանի ժամանակով)։
Միայն ընտրված թեկնածուների հետ կապ կհաստատվի։
«Իրավունքի Կողմ» իրավապաշտպան ՀԿ